Gure kezka eta ezinegona adierazi behar dugu gaur egun Txingudiko mankomunitateak duen jarrera eta egiten duen jardunarengatik Hiri Hondakin Solidoen kudeaketari dagokionean.

Abotsanitzetik  behin eta berriz eskatzen ari gara, Txingudiko mankomunitateak, gai honi lotuta, bestelako jarrera bat har dezan, baina gaurdaino, ez dugu ganorazko jarrera eta erantzunik jaso.

Gure eskualdean, birziklatze tasa % 48,5a den bitartean, gainontzeko  zaborraren erdia baino gehiago errefusa gisa sortzen ari gara. Gipuzkoako zabortegiak bete ditugula eta gainezka daudela ozen entzun ahal izan dugu azken urteetan, baina aldi berean ez ditugu  bere osotasunean neurri eraginkorrik hartu hori ekiditeko. Bestelako sistemak abiatu direnean, jakin badakigu zer nolako kanpaina mediatiko-politikoa eman zen Gipuzkoan.

Hondarribia eta Irunen errefusaren kontenedorea nolanahi erabiltzen da eta bertan mota guztietako edukiak lagatzen ditugu (plastikoa, kartoia, organikoa, aulkiak, mantak, arropa,etab luze bat).

Gaur egun zabortegietan,  22.000 tona errefusa metatzen ari gara urteko eta kudeaketa egokiagoa eginez gero, 4.000 tona izango lirateke.

Gogor salatu behar dugu Txingudiko mankomunitateak  duen jarrera arduragabea, bai  TXINZER S.A. enpresaren aldetik, zein nagusi diren alderdi  politikoetatik ere.

Gure eskualdean, gai honi lotutako eztabaida eta partehartze prozesuak  abiatu ditzan eskatu dugu mankomunitateko batzarretan, berziklatze tasak nabarmenki gora egin dezan. Baina argi geratu zaigu ez dela Hiri Hondakin Solidoen gaineko eztabaidarik eta halako prozesurik  eman nahi.