Plataforma Osasun Bidasoa.-Bidasoan osasun-arreta publikoak okerrera egin du pixkanaka, eta, horren ondorioz, herritarrak mobilizatu egin dira Osakidetzak ematen dituen zerbitzuen itxieraren eta prekarizazioaren aurka.
Osakidetzak apirilean iragarri zuen Bidasoako pediatriako arretaren irisgarritasuna eta kalitatea hobetuko zituela; hitz eman zuen anbulatorioetako arreta pediatrikoaren ordutegiak astelehenetik ostiralera 17:00ak arte luzatuko zirela. Bertan ez zen aipatzen hobekuntza horrek Bidasoa Ospitaleko pediatriako larrialdiak ixtea zekarrela - 36 urtez herritarrei zerbitzu ona eman diena-.
Duela denbora bat, haur eta gazteen psikiatriako kontsulta itxi zen, 500 familia ingururi zerbitzu bikaina ematen ziena. Egoera horrek protesta-mugimendu bat sortu zuen, kaltetutako familiek gidatua. Osakidetzak zerbitzua berrezarriko zuela agindu zuen, eta familiak Donostiara bidali zituen, non zerbitzua ordurako gainsaturatuta zegoen.
Handik gutxira, apirilaren 13tik eskualdeko ospitaleko pediatriako larrialdiak itxi dira, eta pediatriako arreta ez da hobetu, agindu bezala. Ospitalearen inguruko familiei arreta ematen zien ospitaleko lehen mailako arretako pediatriako kontsulta itxi da. Horrek Bidasoan pediatra bat galtzea dakar. Pediatren kopurua 12tik 11ra jaitsi da. Aste honetan bertan pediatrak falta dira Irun erdigunean (5etik 2) eta Hondarribian (3tik 1). Arratsalde batzuetan 17:00ak arte eskaintzen da arreta, baina ez egunero, ezta 3 anbulategietan ere.
Apirilaren 13ra arte, Bidasoa Ospitaleko pediatriako larrialdietan, batez beste, 25 haur artatzen ziren egunero. Gora egiten zuten kopuru horiek birus eta arnasketa-infekzioen agerraldietan. Osakidetzak emandako datuen arabera, kasuen % 20 pediatrek artatu behar zituzten nahitaez ospitalean, eta % 1ak Donostia Ospitalean ingresatu behar zuten.
Osakidetzak publikoki adierazi du Bidasoako pediatriako larrialdiak behin betiko ixteko asmoa.Gipuzkoako eskualdeko gainerako ospitaleek (Bidasoan artatzen denaren antzeko biztanleria dutenak) pediatriako ospitale-zerbitzua dute, larrialdiak egunean 24 orduz artatzen dituena. Hori da Bidasoarako eskatzen dugun eredua. Eredu hori 2012ra arte genuena da, ospitaleko pediatria-zerbitzua kentzea eta lehen mailako arretako pediatrei ospitaleko larrialdietako lan zama gehitzea erabaki zen arte. Ereduak porrot egin du, eta eskaintzen diguten irtenbidea larrialdiak ixtea da, ez ordea 2012a baino lehenagoko eredura itzultzea. Eredu horrek Zumarraga, Mendaro eta Arrasateko ospitaleetan arrakastaz funtzionatzen du.
Baina ez da arreta pediatrikoa bakarrik. 2022 geroztik Urologia-zerbitzua bertan behara egon da eta duela gutxi itxi da, hilabeteak edo urtebete arte zain daramaten pazienteak Donostia Ospitalera bidaliz. Dunboan 5 familia-mediku falta dira; beraz, 7.000 herritar inguru familia-medikurik gabe daude. Helduen osasun mentalaren zerbitzuak gabeziak dakartza aspaldidanik. Minaren unitatea berriro ireki da urtebeteren ondoren, baina onartezinak diren itxaron zerrendak pairatzen ditu. Traumatologian artatua izateko itxaronaldia 6 hilabetetik gorakoa izaten da batzuetan, etab.
Hori guztia dela eta, OSASUN BIDASOA plataformatik eta haur eta nerabeen psikiatriako kontsultaren itxierak eta haur-larrialdietako zerbitzuaren itxierak kaltetutakoen plataformen partaidetzarekin, dei egiten diegu Irun, Hondarribia, Bortziriak eta Iparraldeko herritarrei maiatzaren 31n larunbatarekin 18:30etan Irungo San Juan plazatik abiatuko den manifestazioan masiboki parte hartzera. Manifestazioa baino lehen, 17:30etatik aurrera, haurrentzako jarduera batzuk antolatu dira, seme-alabak edo bilobak dituzten familiak mobilizaziora anima daitezen.
Bidasoako osasun-zerbitzu publikoen murrizketa gehiagorik ez.
Bidasoako ospitaleko larrialdi pediatrikoak berreskuratzeagatik.
Haur eta gazteen psikiatriako eta urologiako kontsultak berriro irekitzeagatik.
Osasun-zentroak familia-medikua eta pediatrez behar bezala hornitzeagatik.
Itxaron-zerrendak murrizteagatik.
EZ GAITZATEN ENGAINATU. DITUGUN ETA MEREZI DITUGUN ZERBITZUAK ERREKLAMA DITZAGUN.
#FSALUDMENTALIRUN
#URGENCIAS PEDIATRICAS BIDASOA