Irungo eta Hondarribiko Udalek, Bidasoa bizirik-en bidez, eta Tknika, Mondragon Unibertsitatea, Bidasoa LHII, Plaiaundi BHI eta Irungo La Sallerekin batera, jarduera ezberdinak antolatu dituzte elkarlanean, pertsona ekintzailearen egunaren harira.

Modu horretan, ekintzailetzaren kultura gizarteratzea eta eskualdeko ikasle gazteen artean izaera ekintzailea zabaltzea bilatzen da. Bidasoa eskualdean dauden hiru Lanbide Heziketa zentroetan ekintzailetzaren inguruan egiten duten lana ezagutu araziko da, ikasleen eta irakasleen ahaleginari aitortza publikoa eginez.

“Jarduera ekintzaileari balioa eman nahi diogu, eta adibide gisa balio dezan espero dugu, ikasleek ekintzailetza kontuan har dezaten, etorkizun profesionalerako”, erantsi du Miguel Ángel Páez Bidasoa bizirik-eko presidenteak.

Juan Mari Altuna Bidasoa bizirik-eko presidenteordeak ondorengoa azpimarratu du: “Garrantzitsua da gaur denok hemen bildu izana, indarrak batuz estrategia bateratua garatzeko, jarduera ekintzailearen balioa nabarmenduz”.

Jarduerak
Ekimena gaur hasi da, Irungo La Sallen; asteazkenean Plaiaundiren eta Bidasoa Institutuaren txanda izango da.

Emakumezkoen ekintzailetzari keinua eginez, Irungo La Sallen mahai-ingurua egin dute Leire Gil (Myl Mugan Asesoras) eta Carolina Ruizekin (CR Estudio). Bertan, ikasleek emakumeen esperientziaren berri izan dute, eta haienak ere azaldu ahal izan dituzte.

Maiatzaren 16an, Plaiaundi Institutuan, Linkedinen eta ekintzailetzaren inguruko hitzaldia egongo da, Ainhoa Gómez adituaren eskutik. Gainera, goi eta erdi mailako zikloetako ikasleek Krea Bidasoako hackathon-ean sortu zituzten APPak aurkeztuko dituzte, mahai batzuetan.

Bukatzeko, maiatzaren 17an Bidasoa Institutuan, jardunaldiaren aurkezpena egingo du Zentroko Zuzendaritzak, gero Bidasoa bizirik-eko teknikariek hartuko dute hitza, eta bukatzeko, Bidasoa Institutuak ekintzailetzaren inguruan egindako bideoa jarriko dute.

Hiru jardueretan, Mondragon Unibertsitateko Lidergo Ekintzailea eta Berrikuntza graduko  ikasleek parte hartuko dute. Gainera, hiru egunetan zehar Photocall bat egongo da, ikasleek sare sozialetan “Pertsona ekintzailearen eguna” elkarbana dezaten.

Sarien banaketa
Krea Bidasoan zehar, hiru LH zentroetako ikasleek mugikorretarako aplikazio teknologiko ezberdinak sortu zituzten. Apirilaren 20az geroztik eguneko proiektu bat argitaratzen ari da, eta denbora horretan (10:00etatik 10:00etara), bozka daiteke, sare sozial ezberdinetan atsegin dut edo like emanez.

Modu horretan, zentro bakoitzeko bozka gehien biltzen duen proiektuak saria jasoko du. Time Scout Escape Irun-erako sarrerak izango dira sariak. Bertan, haien ekintzaile gaitasunak garatu ahal izango dituzte, proba ezberdinetan. Gainera, sarrerak banatuko dira, jardueran parte hartzen duten ikasleen artean.

Proiektu komuna
“Bidasoko LH Zentroetan Izaera Ekintzailea Garatzeko Programa”n txertatuta dago ekimena, eta Gipuzkoako Foru Aldundiko Ekonomia Sustapena, Landa Garapena eta Lurralde Oreka departamentuaren finantziazioa jasotzen du.