LAB.- Berriki, Eusko Jaurlaritzak iragarri du urtarrilean Ertzaintza eta Udaltzaingo ezberdinetako lanpostuak betetzeko hautapen prozesu bakar bat burutzeko asmoa duela.

Urrats honekin EAJk eta Eusko Jaurlaritzak Udaltzaingoak “Ertzaintzatu” nahi dituzte. Aurrez Udaltzaingoko bitarteko agenteen poltsarekin, agenteen deialdi bateratuarekin, Segurtasun Publikoaren Legearekin, Udaltzaingoen Koordinazioarekin... egin bezala, aspaldiko helburua gauzatzen jarraitzeko beste urrats bat da hau. Segurtasun Sailak bere Ertzaintzarekin dituen arazoak udaltzainak kontrolatuz eta zuzenduz konpondu nahi ditu Erandiotik.

Deialdi bateratuak ez baziren udaltzainen integraziorako eredu egokia, udaltzaingoko polizia eredua Ertzaintzaren berdina izan dadin emandako azken urrats hau, udaltzainen desintegraziorako erabateko apustua da. Erabaki hau funtzionatzen ez duen eta arazoak besterik ematen ez dituen eredu batekin sakontzeko beste urrats bat da. Jendartearen egungo arazoei erantzunik ematen ez dien eredu agortuan itsu-itsuan jarraitzea da.

Aurreko urratsen moduan Udal autonomia murrizten jarraitzeko beste pausu bat da honakoa. Negoziazio kolektiborako eskubidearen aurkako hamaikagarren erasoa izateaz gain, Udaltzaingo ezberdinetan dagoen enpleguaren egoera larriarekin bukatzeko soluziorik ez dakarren neurria da hau. Egoera zein den ikusita, LAB sindikatutik honakoa adierazi nahi dugu:

• Udal autonomia murrizten jarraitzeko hamaikagarren urratsa den deialdi honen aurrean orain arte izandako utzikeria albo batetara utzi eta arduraz jokatzeko exigitzen diegu Euskal Herriko Udalei.
• Udalez-udal hautapen prozesu propioak martxan jartzeko unea da, Udaltzaingo plantilen dimentsioak aztertuz, herritarren beharrak gain hartuta zerbitzu publikoaren kalitatea handituz. Udaletako LPZren barruan dauden lanpostu guztiak eskaini daitezela, langileen ordezkariekin lehentasunak, prozesuak, profilak eta abar negoziatuz.
• LABek herritarrekiko hurbiltasunean eta integrazioan oinarritzen den udaltzain eredu bat defendatzen du. Bada garaia, euskal jendarteak eskatu eta behar duen kalitateko segurtasun publikoaren bidean, Euskal Polizia proaktiboa, jendartean integratua, jendartearen beharrei erantzungo diena eta berdintasun baloreetan oinarriturikoa abian jartzeko.