Bidasoko EH Bildu.- Urtarrilaz geroztik, ipar eta hego Euskal Herria lotzen dituzten zortzi pasabide itxi dituzte Frantziar eta Espainiar estatuek, «terrorismoaren kontrako borroka» eta migrazioa oztopatzeko argudioak aitzakitzat hartuta.

Horrez gain, neurriz kanpoko presentzia militar eta poliziala areagotu da zenbait lekutan, Gipuzkoa eta Lapurdi lotzen dituzten pasabideetan kasu, zeinetan kontrol polizialak ugaritu diren.

Hala, egun batetik bestera, Irun, Hendaia, Biriatu, Urruña eta Hondarribiko herritarren arteko ohiko harreman familiar, afektibo, kultural, sozial eta ekonomikoak oztopatu dizkigute, inposaketaren bitartez.

Hartu den erabaki autoritario eta zentralistak Euskal Herria ukatzen du eta gure eskualdean eragin nabarmena dauka. Era berean, migranteen kontrako ehiza areagotzen du eta eskuin muturreko ideien hegemonia indartzen du «terrorismoa» eta migrazioa lotuz.

Bidasoko EH Bildutik muga artifizialak ixtearen eta kontrol polizialak indartzearen erabakiak irmoki salatzen ditugu. Horretarako, Irungo eta Hondarribiko udaleten mozioak aurkeztu ditugu udalek neurriak salatu eta mugak irekitzeko indarra egin dezaten. Argi baitugu udalek ezin dutela isilik egon gure eskualdearen bizitza gehiegikeriaz eta modu bidegabean baldintzaten duten erabakien aurrean. Halaber, Akitaniak, Euskal Autonomia Elkarteak eta Nafarroak osatzen duten euro-eskualdeak ere indarra egin beharko luke eta hori eskatzen diogu mozioan. Izan ere, horrelako erabakiek kinka larrian jartzen dituzte Europan asmatutako euro-eskualdeak. Paperean elkargunea baina errealitatean horrelako erabakiak ekiditeko inolako eraginkortasunik gabe.

Aipatutakoaz gain, gogorarazi nahi dugu, EH Bilduk eta EH Baik sinadura bilketa abiatu dugula mugak berehala ireki daitezela exijitzeko. EH Bildu eta EH Bairen webguneetan sina daiteke jada ehunka sinadura lortu dituen “Euskal Herrian mugarik ez” ekimena. Zentzu honetan eta euren egunerokotasunean duen eraginagatik, ekimena sinatzeko dei berezia luzatzen diegu eskualdeko herritarrei.

Esan bezala, espainiar eta frantziar estatuek mugak inposatu nahi dizkigute Euskal Herri barruan. EH Bildun argi daukagu inoiz baino beharrezkoa dela nazioa garela aldarrikatzea eta ozen diogu: Herri bat gara, Euskal Herrian mugarik ez!