Osasun Bidasoa.- Bidasoan osasun publikoaren arretaren etengabeko okertzeak herritarrak berriro mobilizatzera bultzatu ditu, Osakidetza-k eskaintzen dituen zerbitzuen itxieraren eta prekarizazioaren aurka.

2025eko apirilaren 13an Hospital Bidasoa-ko pediatriako larrialdiak itxi ziren, eta ez da hobetu agindu zen arreta pediatrikoa.

Osasun-zentroetako pediatren kopurua 12tik 11ra murriztu da. Ospitalean artatzen zen pediatriako kupoa kendu zen, eta hilabete luzez ez zitzaien pediatrarik esleitu kaltetutako familiei. Arratsalde batzuetan 17:00ak arteko arreta eskaintzen da, baina ez egunero eta ez hiru anbulategietan. Hilabete askotan pediatraren plaza asko bete gabe egon dira; ondorioz, larrialdiak soilik artatu dira eta ez dira berrikuspen programatuak egin. 24 orduz eta astean 7 egunez pediatraren arreta izatetik, eguneko 9 ordura eta astean 5 egunera igaro gara. Irun Centroko larrialdietan ez dago pediatrarik. Familiek Hospital Donostia-ra jo behar dute pediatra batek artatu ditzan.

Haurren eta gazteen Osasun Mentaleko arreta oso prekarioa izaten jarraitzen du. Psikiatra bat berreskuratu da, baina erizain bat galdu da. Ez da agindutako bigarren psikiatra kontratatu; ez dago koordinaziorik hezkuntza-zentroekin, eta arreta ematen den instalazioek egiturazko gabezia handiak dituzte (intsonorizaziorik eza, helduek eta haurrek partekatzen duten itxaron-gela, etab.).

Baina ez da pediatriaren kontua soilik. Urologia-zerbitzuak ez du espezialista propioekin funtzionatzen 2022tik; tarteka beste ospitale batzuetako urologoek artatzen dituzte pazienteak, baina ez dira ebakuntza kirurgikoak egiten Bidasoa Ospitalean. Helduen Osasun Mentalaren arretak urteetako gabeziak ditu; psikiatria eta psikologiako profesionalen kopurua ez da nahikoa. Minaren Unitatea noizean behin bakarrik dabil, eta itxaron-zerrendak onartezinak dira.

Ospitaleko espezialista batek artatua izateko edo familia-medikuak eskatutako proba diagnostikoak egiteko itxaron-zerrendak ez dira batere hobetu. Osakidetza-k bere profesionalei emandako azken datuen arabera, Traumatologiako lehen kontsultarako 178 eguneko itxaronaldia dago; Errehabilitaziorako 118 egun; Otorrinolaringologiarako 95 egun; Kirurgia Orokorrerako 91 egun; Dermatologiarako 86 egun; Digestiborako 72 egun; Oftalmologiarako 70 egun; eta Ginekologiarako 61 egun. Osakidetzak dio 2025 amaieran, oro har, kontsultetarako itxaronaldia 56 egunekoa zela. Bidasoan, ordea, batez besteko hori nabarmen gainditzen da espezialitate gehienetan. Ekografietarako eta beste proba diagnostiko batzuetarako itxaronaldia ezezaguna da, eta aldian-aldian zerbitzu pribatuetara bideratzen dira.

Egoera hau Osakidetza-ren kudeaketa historikoki txarraren ondorioa da. 2025eko abuztuan gerentzia berritu zen, baina ez zuzendaritza-taldeko gainerako kideak, gaur egungo egoera larriaren arduradun zuzenak.

Duela gutxi ebakuntza-gela berrien obrak hasi dira. Horrek ohe-itxierak eta paziente, ekipamendu eta profesionalen etengabeko lekualdaketak ekarri ditu. OSASUN BIDASOA-k lehenago salatu zuen bezala, martxan dagoen ospitale baten barruan 3 urtez obrak egitea ez da irtenbide egokia. Eraikin erantsia eraikitzea (Hospital de Zumarraga-n eta Hospital de Arrasate-n egiten ari diren bezala) aukera hobea izango zen. Ulertezina da profesionalen eta pazienteen interesentzat kaltegarriena den aukera hautatu izana. Eskualdean agindutako gainerako inbertsioak bete gabe jarraitzen dute. Irun Centroko anbulategiak 2020ko uztailetik atzeko patioan jarritako barrakoiekin jarraitzen du. Ez dago berririk Udalak lagatako Alarde kaleko lokalen egokitze-lanei buruz. Oinaurreko anbulategia eraikitzeko proiektua ez da aurrera doala dirudi. Ez dago berririk egungo Irun Centroko anbulategiaren etorkizunaz eta Bidasoa Institutuko patioan birkokatzeko aukeraz.

Horregatik guztiagatik, OSASUN BIDASOA-k, pediatriako larrialdien itxierak eta haur eta gazteen psikiatriaren prekaritateak kaltetutakoekin batera, Irun, Hondarribia, Bortziriak eta Iparraldeko herritarrak eta osasun-profesionalak martxoan deitutako elkarretaratzeetara etortzera dei egiten ditu. Elkarretaratzeek 10 minutuko iraupena izango dute.

• martxoaren 4an, asteazkena, 14:00etan, Irun Centroan.
• martxoaren 11n, asteazkena, 14:00etan, Dumboan.
• martxoaren 18an, asteazkena, 14:00etan, Hondarribian.
• martxoaren 25ean, asteazkena, 14:00etan, Iruneko Osasun Mentaleko zerbitzuan.
  
  

EZ GEHIAGO OSASUN ZERBITZU PUBLIKOEN MURRIZKETARIK BIDASOAN.

BIDASOA OSPITALEAN PEDIATRIAKO LARRIALDIAK BERRESKURATZEAREN ALDE.

UROLOGIAKO KONTSULTAK ETA MINAREN UNITATEA BERRESKURATZEAREN ALDE.

HAUR ETA GAZTEEN ETA HELDUEN OSASUN MENTALAREN ARRETA INDARTZEAREN ALDE.

OSASUN-ZENTROETAN FAMILIA-MEDIKU ETA PEDIATREN HORNIDURA EGOKIAREN ALDE.

ITXARON-ZERRENDAK MURRIZTEAREN ALDE.

BIDASOA ESIKO ZUZENDARITZA-TALDEAREN BERRITZE ZABALAREN ALDE.

EZ GAITEZEN ENGAINATZEN UTZI. BERRESKURA DITZAGUN GENUZKAN ETA MEREZI DITUGUN ZERBITZUAK.