Maiatzaren 22an Enpleguaren Asteak logistika, merkataritza, ostalaritza edota gizarte-osasun zerbitzuen sektoreko 383 lanpostu aukera eskainiko ditu Ficoban. Bidasoa Bizirik garapen agentziak antolatzen duen XXXII. edizio honetan, 37 enpresek izena eman dute, eta ohikoa den bezala, mugaz gaindiko enplegu bilaketarako Lanbide-Eures, France Travail eta Nafarroako Enplegu Zerbitzuak ere parte hartuko dute.

Udalak etxebizitza larrialdiaren aurrean alternatibak bilatzeko "Hondarribia Bizitzeko" jardunaldia antolatu du maiatzaren 2an eta 3an Itsas Etxean. Herritarren «mentalitatean iraultza» bilatzeko etxebizitza alternatiba posibleetaz hausnartzeko hainbat aditu gonbidatu dituzte ostiralean 17:30etatik aurrera. Larunbatean, etxebizitzaren aldeko aldarrikapenak musikaren bidez jarraituko du, 20:00etan (15 eurotan) Biznaga, Adur eta Dolerme taldeen kontzertuekin.

Neguko sasoirako “Hotz Plana” abenduaren 1etik martxoaren 31ra arte martxan egon da Hendaian, kalean bizi diren pertsonei aterpea emateko helburuarekin. Gizarte Ekintzarako Udal Zerbitzuak, Gurutze Gorria, Txoko eta Atherbea elkarteekin elkarlanean antolatu du dispositiboa. Txomin Elizondo GEUZeko zuzendariak planaren emaitzak eta hobetzeko ildoak azaldu dizkigu elkarrizketa honetan.

2025eko urtarriletik indarrean behar zuen bi urteko kontratua, eta martxoan egokitzapen lanak amaitzeko maiatzaren 1era atzeratu ondoren, Artia, Larreaundi, Elizatxo eta Kostorbe-Galeko 2.996 TAO plaza eta eremu berriak agindua eman arte ez aplikatzea erabaki du udalak. 1.840 egoiliar txartel berri kudeatu dituzte dagoeneko, eta enpresari atzerapenaren inguruko azalpenak eskatu dizkio, sistema martxan jartzeko konpromisoa hartu zuelako parkimetroak izan bezain laster.

Apirilaren 30etik maiatzaren 4ra ospatuko dituzte. Asteburu luzea prestatu du auzo elkarteak bertako eragile eta bizilagunekin elkarlanean. Rock kontzertuak, Irun Hiria Musika Bandaren emanaldia, haur jolasak, Bidasoako Erraldoiak eta buruhandiak, kantubira, tortila txapelketa, paellada, mendi irteera edota auzoko paseo historikoa prestatu dute, besteak beste, Eguzkitza ikastetxea, Los Perolas elkartea edota auzokide duten Zubia zentroaren partaidetzarekin.

Engie Solutions enpresari esleitu dio eraikuntza eta sei urteko ustiapena Hendaiako Herriko Etxeak. Irandatzeko lau eraikin publikoak biomasarekin berotuz, urtean 248 tona CO2 gutxiago kutsatuko da.

Iragan ostegun eta ostiralean bi mahainguru eta hainbat tailer praktiko izan ziren, hainbat kolektibitatek migrazioarekin duten harremana ezagutzeko. Legea, poliziaren lana eta elkartasuna uztartu daitezkeen landu zuten bertzeak bertze.

Maiatzaren bigarren hamabostaldian MUGI birtuala erabiltzen hasiko dira Irunbus lineatan proba-piloto gisa. Irungo autobusek balidatzeko gailu berriak instalatuak dauzka dagoeneko. Eta txartel fisikoa erabiltzen jarraitzeko aukera emango badu ere, birtualak abantaila ugari dituen sistema dela argitu du Gipuzkoako Foru Aldundiak. Informazio guztia denbora errealean ikusi, karga automatikoak programatu edota familia osoaren MUGI txartelak gainbegiratzeko aukera emango du, besteak beste.

Euskaraldia ikustarazteko herri eragile anitzen laguntzarekin egitarau oparoa aurkeztu dute Irunen. Maiatzaren 15etik 25era egingo den ariketa soziala «simulazio edo erakuslehio» izatetik «benetako konpromisoak» hartzeko baliagarria izatera pasa dadin nahi dute. Politikariak eredugarri behar dutela izan aitortu dute udal ordezkariek, eta herri eragileekin batera «euskara buruan, ahoan eta bihotzean» eramateko deiarekin batera, euskararen egoera Irunen hobetzea «ez da utopia bat» Iosu Iguiñiz arloko zinegotziaren arabera.

Beste bizi eredu  baten alde eginez, hainbat belaunaldik ikasteko, antolatzeko, esperimentatzeko eta trebatzeko aukera izan dute Lakaxitan bi hamarkada hauetan zehar. Gazte belaunaldi anitz ikusi ditu gaztetxeak, eta Jaion bestan, oraingo gazte mugimenduko kideak ez ezik, hasierako belaunaldietakoak ere topatu ditu Antxeta Irratiak. Gazte mugimenduaren historiaz hausnartu eta memoria ariketa egin dugu haiekin. 

Itsasadarra podcastaren hirugarren atalean turismoa eta aisialdia izan ditugu hizpide. Turismotik ere bizi den eskualdea da gurea, urtean milioika bisitari hartzen ditugu. Zer leku dugu hor gazteok? Nolako aisialdi eskaintza eragiten du horrek? Galdera horiei erantzun diegu Yera Laka, Amaiur Miguel eta Martxel Elosegirekin.

Gure ingurumena ezagutzeko eta disfrutatzeko ibilaldiak antolatzea baino bide ludikorik ez dugu ezagutzen. Baso Biziak Plataformako taldeok, landaketez gain, hainbat irteera ekologiko-hezitzaileak antolatzen ditugu familiarteko giroan, etxeko gazteenek beraien Naturguneak eta biodibertsitatea ezagutzeko eta disfrutatzeko.

Irungo C.D. San Marcial futbol elkarteak antolatu duen Ricardo Gomez IV. Txapelketak 2013-2016 urteetako 800 haur baino gehiago biltzen ditu egunotan Larreaundin. Ekimen solidarioa da, eta irabaziak Irungo Harrera Sarea laguntzera bideratuko dute. Hortaz gain, Tadamum elkartearekin lankidetzan ere ari da kluba, eta Gipuzkoan asilo egoeran bizi diren familia sahararren seme-alabek osatutako selekzio bat gonbidatu dute larunbatean parte hartzera.

Irungo Lakaxita gaztetxeak bi hamarkada bete ditu aurten, eta urteurren borobila ospatzeko, urte osoko egitarauaren ekitaldirik handiena larunbatean ospatuko du, Urdanibia plazatik 17:00etan abiatuta, "Jaion! Urteurren Festa". Etxera bueltako brigadak antolatu dituzte aurreneko aldiz, 1:30ean eta 3:30ean, festa seguru eta askatasunez egin ahal izatea aldarrikatuz. 

Hondarribiko historian aurreneko hiri-barneko autobusa martxan jartzeko kontratua lehiaketara aterako du udalak. Udalbatzan onartu dutenez, MUGI sisteman integratuta egongo da zerbitzua, eta 7,1 kilometroko ibilbide zirkularrarekin 18 geltoki izango ditu, goizeko 7:00etatik 21:00ak arte. Udalak bost urtetara esleitu nahi du zerbitzua, eta ia bi milioi euroko aurrekontua bideratuko du.

Antxetatik Nafarroara (2025-04-24)

FLY SHIT, Bergarako taldea elkarrizketatua izan ondotik, Hardcoreaz haratago doan zuzenezko landua eskeiniko digute.

• Elkarrekin egin dezagun
• Hitzak
• Esnatu lozorrotik
• Sumina
• Barneko ahotsaren bila